Маржан Қанатқызы – INEX EXPO GROUP компаниясының атқарушы директоры, халықаралық іскерлік іс-шаралар мен көрмелерді ұйымдастыру саласында көп жылдық тәжірибесі бар маркетинг және көрме индустриясының маманы.
1990 жылғы 5 қазанда Алматы қаласында дүниеге келген. Алматы қаласы Әуезов ауданындағы №72 орта мектепті тәмамдаған. Маркетинг саласындағы кәсіби білімін Абылай хан атындағы Қазақ халықаралық қатынастар және әлем тілдері университетінің колледжінде «Маркетинг» мамандығы бойынша алған. Кейін Narxoz University-де осы бағыт бойынша жоғары білім алып, одан әрі стратегиялық маркетинг және менеджмент мамандығы бойынша магистратураны аяқтады.
Маржан Қанатқызы көрме индустриясындағы еңбек жолын 16 жасында бастаған. Кәсіби қызметі барысында көмекші мен хатшыдан бастап офис-менеджер, сату менеджері, маркетолог және жоба жетекшісі қызметтеріне дейінгі барлық мансаптық сатылардан өтті. Осындай жан-жақты тәжірибе оған көрме бизнесінің барлық үдерістерін терең меңгеруге және компанияда тиімді басқару жүйесін қалыптастыруға мүмкіндік берді.
Бүгінде атқарушы директор ретінде Маржан Қанатқызы компанияның стратегиялық дамуына, халықаралық көрмелерді ұйымдастыруға, әлемнің әртүрлі елдерінен қатысушылар мен серіктестерді тартуға, іскерлік байланыстарды нығайтуға және заманауи маркетингтік шешімдерді енгізуге жауап береді. Оның басшылығымен INEX EXPO GROUP өндірушілерді, жеткізушілерді, инвесторларды және салалық мамандарды бір алаңға тоғыстыратын ауқымды халықаралық көрме жобаларын жүзеге асырып, Орталық Азиядағы халықаралық ынтымақтастық пен бизнестің дамуына үлес қосуда.
Маржан Қанатқызы кәсібилік, жауапкершілік, әрбір бөлшекке мұқият қарау және ұзақ мерзімді серіктестік – тұрақты табыстың негізгі қағидаттары деп есептейді. Дәл осы ұстаным компанияға бизнестің дамуына, жаңа нарықтарға шығуына және халықаралық іскерлік байланыстарды нығайтуға ықпал ететін тиімді көрме алаңдарын құруға мүмкіндік береді.